Аз жаргал ба үйл хөдлөл

Хүслүүдээсээ, зөвхөн хувь хүний өсөлтөд чиглэгдсэн хүслүүдээ ялгаж авч үйл хөдлөлөө эхлүүлвээс ирээдүйн аз жаргал баталгаажиж байдаг аж. Өөр бусад, шалдир булдар уух, идэх, өмсөх зүүх хүслээс зөвхөн зуурдын таашаал төрдөг. Мод хүртэл дээш өндөр болохыг тэмүүлэн ургадаг бөгөөд хэрэв ургаж болохгүй бол тал бүр рүү салаалан ургаж, саад арилмагц дээш ургасаар өчнөөн салаа мөчиртэй болдог. Үүний адил, хүн ч гэсэн үйл хөдлөлийнхээ явцад зогсолт, өсөлтийг хийсээр аз жаргалд тэмүүлэн амьдарна. Аз жаргалтай байхын тулд, идэвхитэй үйл хөдлөл хамгаас чухал. Долоон удаагийн алдаа, амжилтаас илүү ашигтай байдаг. Тиймээс эргэлзэж тээнэгэлзэхгүй эхэлж, алдаанаас айхгүй байхад суралцах хэрэгтэй болдог байна. Энэ тохиолдолд хийх бүх үйлдэл, үйл хөдлөл тань, алдаатай ч байсан ашиг тус авчирна. Аз жаргал бол эрж хайж олдог зүйл биш. Өөрөөр тань бүтээгддэг. Аз жаргалыг эрэн бэдрэгч нь, нүдний шилээ толгой дээрээ тохчихоод хайгаад байдаг будилуу хөгшинтэй адил юм. Хүн бол амьдрал хувь тавилангийнхаа эзэн, өөртөө дайсан ч байж чадах, найз ч байж чадах зүйл. Хэрвээ хамгийн гол дайснаа мэдье гэвэл өөрийгөө толинд хар гэсэн зүйр үг байдаг. Зөвхөн бид өөрсдийгөө хорлож эсвэл засаж сайжруулж чаддаг. Эцэст нь хэлэхэд, байгаа зүйлсээ үнэлдэг, санаачилга хөдөлгөөнтэй, өөрийгөө ухамсарлаж хүндэтгэлтэй ханддаг, хөгжүүлдэг хүмүүс аз жаргалтай амьдардаг байна.

Мэдээ таалагдаж байвал манай хуудсанд "LIKE" дарж илүү олон шинэ мэдээ мэдээлэл хүлээж аваарай.